Жыццё іншы раз прымушае за вырашэннем нейкіх сацыяльна важных для нас праблем звяртацца за парадай альбо рэальнай падтрымкай да дэпутатаў. Такіх жа грамадзян, якім выбаршчыкі даверылі абараняць свае правы ў органах мясцовага самакіравання.
У складзе Клімавіцкага раённага Савета дэпутатаў зараз шырока прадстаўлены кіраўнікі прадпрыемстваў і арганізацый. Згадзіцеся, гэты фактар з’яўляецца станоўчым.
Дэпутат адназначна павінен мець развіты інтэлект, валодаць здольнасцю ўзаемадзейнічаць з рознымі дзяржаўнымі структурамі, застаючыся прынцыповым абаронцам інтарэсаў сваіх выбаршчыкаў.
Адзін з такіх лідэраў — начальнік аддзела па справах моладзі райвыканкама Таццяна Меньшыкава. Дэпутат раённага Савета дэпутатаў па Болдзінскай выбарчай акрузе № 17.
— Акрамя ўсяго, Вы яшчэ з’яўляецеся членам пастаяннай камісіі райсавета дэпутатаў па пытаннях бюджэту, эканомікі і падаткаабкладання. Як удаецца спалучаць свае непасрэдныя, службовыя, абавязкі з грамадскімі? — пацікавіўся ваш карэспандэнт у маладзёжнага лідэра. — Плюс да таго, Вы ўзначальваеце прафсаюзную арганізацыю райвыканкама.
— Імкнуся ніколі не збаўляць тэмпу, каб усё паспець. Мне падабаецца работа, калектыў, дзе працую. Гэта, лічу, аснова любога поспеху.
— Хто дапамагае вырашаць акрэсленыя вашым статусам задачы?
— У нас падабралася сапраўдная каманда аднадумцаў. Дзейнічаем узгоднена і эфектыўна разам з калегамі, якія займаюцца рэалізацыяй дзяржаўнай маладзёжнай палітыкі. Гэта кіраўніцтва, актывісты раённых грамадскіх арганізацый. Вядома, як дэпутат адчуваю дзейсную падтрымку раённага Савета на чале з яго старшынёю Мікалаем Далгуном. Заўсёды можна спадзявацца на рад кіраўнікоў. Сярод іх хацела б асабліва падзякаваць дырэктару філіяла РУП “Магілёўэнерга” Клімавіцкія электрычныя сеткі Віктару Асмалоўскаму, начальніку РВЭС Мікалаю Дулубу.
—Таццяна, з якімі просьбамі звяртаюцца выбаршчыкі?
— Мая акруга ўключае ў сябе 10 вуліц. Там пражываюць звыш 700 чалавек. Перыядычна сустракаюся з жыхарамі. У тым ліку з удзелам прадстаўнікоў розных дзяржаўных службаў. Гэта дапамагае валодаць сітуацыяй, акумуляваць інфармацыю і карыстацца ёю, каб здымаць праблемы. У асноўным яны тычуцца работы УКП “Камунальнік”, добраўпарадкавання, закінутых домаўладанняў, атмасферы ў сем’ях, паводзін непаўналетніх і г. д.
— Удаецца штосьці зрабіць?
— Па майму дэпутацкаму запыту ў камунальную службу ўстаноўлена водаразборная калонка паміж дамамі 66-84 па вуліцы Болдзіна. Самі жыхары акругі неабыякавыя да праблем у бліжэйшым наваколлі. Напрыклад, дзякуючы іх ініцыятыве зроблена абарончая агароджа пешаходнага пераходу па мосце праз раку Калініца.
Двойчы на працягу года робім абход вуліц з мэтай навядзення парадку на зямлі. Каб паправіць сітуацыю, вядзём растлумачальную работу. Заўсёды ў гэтым плане падтрымліваюць аддзел жыллёва-камунальнай гаспадаркі райвыканкама, арганізацыі горада. У прыватнасці, выкананы работы па добраўпарадкаванню калодзежаў, пляцовак для збору смецця на вуліцы Трудавой.
Даводзіцца таксама ўздзейнічаць з дапамогай участковага інспектара РАУС Уладзіміра Васілеўскага на абавязаных, раней судзімых асоб, вырашаць бытавыя канфлікты паміж суседзямі і многія іншыя пытанні.
— Што Вы адчуваеце пасля ўсіх такіх клопатаў?
— Прыемна, калі дапамагаеш людзям справіцца з вострай сітуацыяй. Увогуле, лічу, што скардзіцца на жыццё ніколі нельга. Мой дэвіз — быць аптымістам, несці іншым сваю пазітыўную энергію. Бо са стрэсавых абставін выбірацца цяжка. Трэба верыць у лепшае, змагацца за яго.
Гутарыў Мікалай Глуздоў.
Домой Официально