Залатыя рукі і чулая душа

Каля трыццаці гадоў займаецца вышыўкай жыхарка аграгарадка Лобжа Наталля Каваленка. За гэты час яна вышыла шмат ручнікоў, абрусаў, сурвэтак, кашуль, фартухоў, навалачак…
Некаторыя свае вышываныя рэчы падарыла сябрам, перадала ў раённы краязнаўчы музей. Асобныя яе работы — на рэлігіёзную тэматыку.
— Сама прыдумваю ўзоры. Малюю іх. Потым вышываю акрылавымі ніткамі крыжыкам ці гладдзю, — кажа Наталля Мікалаеўна.
Зараз гэта майстрыца вышывае карціну “Лебедзі на возеры”.
Наталля Каваленка працуе загадчыцай Лабжанскага клуба. Добры голас, якім валодае жанчына, дастаўся ёй у спадчыну ад бацькі Мікалая Міхайлавіча. У гэтай цікавай жанчыны ёсць і яшчэ адно важнае захапленне. Яна — аўтар больш дваццаці песень. Шаснаццаць з іх пакладзены на ноты. Неўзабаве яны ўбачаць свет у зборніку нашай зямлячкі. Тэматыка твораў самая розная — пра каханне, пра сэнс жыцця, дзіцячыя песні.
— У школьныя гады спрабавала пісаць вершы. А цяпер песні нібыта самі “пачалі нараджацца” у маёй галаве, а я пераношу іх словы на паперу, — радасна гаворыць мая суразмоўца. — Менавіта песня дае мне сілы, падбадзёрвае.
Адна з песень Наталлі Мікалаеўны прысвечана Міжнароднаму фестывалю “Залатая пчолка”, які праходзіць у нашым горадзе.
Н. М. Каваленка з’яўляецца кіраўніком многіх гурткоў і аматарскіх аб’яднанняў, якія дзейнічаюць пры клубе. Да яе заўжды з ахвотай прыходзяць дарослыя і дзеці.
Жыхарка аграгарадка любіць кветкі, якіх у яе доме багата.
Таццяна Падліпская.
На здымку: Наталля Каваленка.

Опубликовать в Google Plus
Опубликовать в LiveJournal
Опубликовать в Мой Мир
Опубликовать в Одноклассники