Кожны сапраўдны гаспадар стараецца, каб яго падвор’е было дагледжана, імкнецца зрабіць прыгажосць і ўтульнасць у кватэры, у хаце, на сваім двары.
Чамусьці мы часам забываем (ці не лічым?), што наш горад, вёска — таксама наш дом, агульны. І толькі разам клапоцячыся пра яго, мы зможам зрабіць наш агульны дом чыстым, прыгожым, утульным.
А гэта не складана: варта ўсяго не смеціць, не ламаць, цаніць і шанаваць тое, што ўжо зроблена. І па-мажлівасці прыўнесці нешта сваё.
Добрых прыкладаў нямала. Зона адпачынку насупраць дома № 24 на вуліцы Герцэна: лавачкі ў цені ніцых вербаў, дзіцячыя горкі, арэлі… Шмат кветак.
Кветкі. Іх мноства ў нашым райцэнтры. Шмат прыгожых кветнікаў зрабілі працаўнікі УКП “Камунальнік”. Але ж нямала дзе пастараліся і самі жыхары.
Цудоўны кветнік каля дома № 6а на вуліцы Кірава. Многа дзе кветкі ўжо адцвілі, засохлі, а тут — прыгажосць. Гэта заслуга Жаны Віктараўны Баханковай. Цераз дарогу — дом № 5. Там таксама стракаціць дыван восеньскіх кветак. Гартэнзіі, астры, хрызантэмы, маргарыткі, аксаміткі, гладыёлусы, вяргіні, календула (наготкі)…
Шмат прыгожых малых архітэктурных форм зрабілі прадпрыемствы і арганізацыі горада.
Адчуваецца любоў да малой радзімы.
