У суботу на Фестывальнай плошчы ў Клімавічах сабралася багата народу. А нагода самая лепшая — тут ладзілася свята “Як на Масленічным тыдні”.
Надвор’е — як на тое: сонечнае, з лёгкім прыемным марозчыкам.
Перад гасцямі разгортваецца інтэрактыўны спектакль.
Суседкі Марыля, Хадора і Куліна распавядаюць пра традыцыі свята.
Яно працягвалася цэлы тыдзень. Кожны дзень меў сваё прызначэнне і назву.
Панядзелак — “Сустрэча”. Робяць Масленіцу (ляльку) і прыбіраюць яе.
Аўторак — “Зайгрышы”. Дзяўчаты і хлопцы каталіся на санках, выглядаючы сабе жаніхоў і нявест.
Серада — “Лакамка”. Цешчы запрашалі зяцёў на бліны.
Чацвер — “Разгул”. Каталіся на санках, выконвалі розныя абрады.
Пятніца — “Цешчыны вячоркі”. Зяці частавалі блінамі сваіх цешч.
Субота — “Залоўкіны пасядзелкі”. Маладая нявестка запрашала ў госці сваякоў.
Нядзеля — праводзіны Масленіцы. На вогнішчы спальвалі ляльку-Масленіцу, што сімвалізавала сабой адыход зімы, і прасілі прабачэння адзін у аднаго за крыўды, грахі.
І вось на двор узыходзяць розныя госці. А першымі — народны ансамбль народнай песні
“Цімаўляне” з пудзілам Масленіцы (самаробнай лялькай).
Выступалі таксама народны жаночы вакальны ансамбль “Задорніцы”, народны ансамбль народнай песні “Беразуха”.
Таньчылі і гадалі цыганкі.
На свята прыйшлі вясёлыя скамарохі з Клімавіцкага цэнтра дадатковай адукацыі дзяцей і моладзі.
Гледачам прапаноўвалася разгадаць розныя загадкі, пагуляць у народныя гульні. Усіх частавалі духмянымі блінамі.
Разам праводзілі Зіму і сустракалі Вясну, вадзілі карагоды.
Добрае, вясёлае свята атрымалася! 
