Клімавіцкія “Задорніцы” прынялі ўдзел у “Гусіным свяце”. Ладзіцца яно не для гусей. Але ж праходзіць з непасрэдным удзелам гэтых хатніх птушак.
Мерапрыемства штогод праводзіцца ў вёсцы Белая Дубрава Касцюковіцкага раёна. Чарговае прайшло 31 студзеня гэтага года. І мела яно юбілейны статус — адбывалася ў трыццаты раз. “Гусінае свята” з’яўляецца сапраўднай культурнай візітоўкай не толькі Белай Дубравы, але і Касцюковіцкага раёна.
Удзел у мерапрыемстве прынялі і клімаўчане — з канцэртнай праграмай выступілі ўдзельніцы народнага жаночага вакальнага ансамбля “Задорніцы”.
— На гэтае свята мы паехалі па запрашэнню Касцюковіцкага аддзела культуры, — расказвае кіраўнік ансамбля Таццяна Фрузорава. — Запрашэнне прынялі з задавальненнем, тым больш, што ўзначальвае аддзел культуры наш нядаўні калега Сяргей Булянкоў, з якім мы працавалі разам не адзін год.
Сустрэлі нас суседзі вельмі цёпла. Выступленне “Задорніц” гледачы суправаджалі гарачымі апладысментамі.
Самыя лепшыя ўражанні засталіся пасля свята і ў нас. Гэта было цудоўна! Побач ішлі гумар і майстэрства, гучалі народныя і сучасныя песні.
Чаго толькі вартыя былі гусіныя забегі! Дыстанцыя — пятнаццаць метраў. Гаспадары ішлі на самыя розныя хітрыкі, каб прымусіць сваіх птушак хутчэй дасягнуць фінішу. А тыя… Хто бег напрасткі. Хто тармазіў і прыслухоўваўся да шуму балельшчыкаў, а хтосьці імкнуўся і павярнуць назад. Было вельмі весела!
Шмат чаго цікавага адбывалася на свяце. Сумаваць не даводзілася.
У марозны дзянёк можна было выпіць кубачак гарачага чаю і паласавацца стравамі з гусяціны.
Удзельнікі ансамбля ўдзячны дырэктару Клімавіцкай цэнтралізаванай клубнай сістэмы Людміле Маславай за дапамогу ў арганізацыі паездкі.
